Minahasa - Kelompok nelayan Tongkeina dari desa Touliang Oki, kecamatan Eris, Kabupaten Minahasa, Sulawesi Utara, da peringati Hari jadi RI ke-76 deng cara dorang beking upacara bendera deng kegiatan laeng supaya rame ni hari jadi negara tercinta Indonesia. Biar cuma sadiki orang karna lagi PPKM tapi tu anggota deng pengurus kelompok nelayan Tongkeina ini iko upacara ini deng sungguh sungguh.
Acara da mulai jam 4 sore ini di hari kemerdekaan Selasa, 17 Agustus 2021. Yang jadi IRUP pembina kelompok Djolly Sualang, SH, MH. Kong acara mc Ronald Huzein ja baca deng komandan upacara Jemmy Politon ini beking ni acara sama deng tu upacara bendera butul butul. Ada pembacaan Pancasila, Pembacaan teks proklamasi oleh ketua kelompok Tongkeina Bpk. Leksi Solang, pembacaan UUD 1945 oleh bendahara Bpk. Buang Polii dan Doa oleh Hence.
Selesai tu upacara yang dapake prokes ini biar cuma sadiki yang iko upacara karna keadaan dorang trus deng acara baku baku rebe, ada baku rebe perahu deng baku rebe laeng. "Torang bersyukur bole beking ini acara kase rame ni hari yang bersejarah for torang pe bangsa Indonesia," Noldy Noda Maramis bilang yang juga sebagai sekretaris kelompok Tongkeina bersama rekannya Vecky Politon dan Buang Herling Pakasi.
Ada banyak kegiatan yang ni kelompok nelayan Tongkeina desa Touliang Oki ja beking, tu rutin itu pertemuan deng arisan deng kegiatan for kesejahteraan anggota deng tu banyak kegiatan sosial for kase bagus ini danau Tondano yaitu kase bersih ni eceng gondok yang so mengganggu skali tu nelayan ja pi mancari akang ikang di danau.
"Ni eceng gondok ini so baganggu skali pa nelayan katu, torang minta pemerintah bantu akang deng kwa bersama sama satu danau ba angka bukang cuma di beberapa tampa yang akhirnya eceng gondok lebe capat ba tumbuh dari pada yang ba angkat, "Djolly Sualang SH, MH seorang bilang dia dosen Unsrat deng pengacara yang depe istri di sei Greity Kawilarang, Lurah di kota Manado.
Dong se trus tu kegiatan deng rapat singkat da ba bahas tu acara mo beking berikut deng yang paling penting tu mo tarukira akang tu danau Tondana dari tanaman yang ba ganggu yakni tu eceng gondok. (Hence Karamoy)
.jpeg)